Job 6

Impendulo KaJobe

1 Wasephendula uJobe wathi:

2 “Uba ubuhlungu bami bungalinganiswa lokuhlupheka kwami konke kufakwe esikalini!

3 Ngileqiniso kungaba lobunzima obudlula itshebetshebe lezilwandle – akungamangalisi ukuthi amazwi ami abhede kanje.

4 Imitshoko kaSomandla iphakathi kwami, umoya wami unatha itshefu yayo; izihlukuluzo zikaNkulunkulu ziqondiswe kimi.

5 Kambe ubabhemi weganga uyakhala yini utshani bukhona, loba inkabi ikhonye yona ukudla ilakho?

6 Ukudla okuduma kuyadleka na kungelatshwayi, kumbe okumhlophe kweqanda kuyanambitheka yini?

7 Ngiyala ukukuthinta; ukudla okunjalo kubuyisa inhliziyo yami.

8 “He, aluba ngingazuza isicelo sami, uNkulunkulu angiphe lokho engikufisayo,

9 ukuthi uNkulunkulu avume ukungichoboza, ayekele nje isandla sakhe singiqede!

10 Lalapho ngizabe ngilokhu ngilale induduzo intokozo yami ebuhlungwini obungadediyo – ukuthi bengingawaphikanga amazwi akhe oNgcwele.

11 “Ngilamandlana bani ukuthi ngibe lokhu ngithemba? Ngisamelelwe yini ukuba ngibe ngilokhu ngibekezela?

12 Ngilamandla elitshe yini? Inyama yami ilithusi na?

13 Ngilawo yini amandla okuzisiza, manje njengoba sengemukwe impumelelo?

14 “Indoda esilahlekelwa lithemba iswela ukuxhaswa ngabangane, lokuba angabe isidele ukwesaba uSomandla.

15 Kodwa abafowethu kabathenjwa njengemifula egeleza icitsha, njengemifula egabhayo

16 ilezibhidi zeliqhwa eselincibilika njalo igcwele ibila ngongqoqwane osencibilikile,

17 kodwa ikhawule ukugeleza ngesikhathi sokoma, kuthi sekutshisa amanzi anyamalale ezindleleni zawo.

18 Izindwendwe zamakamela ziyaphambuka ezindleleni zazo; zintule enkangala zifele khona.

19 Izindwendwe zaseThema zidinga amanzi, abathengisi baseSheba balinde bethembile.

20 Bayadana ngokuba bebekade bethembile; bayafika khonale bafike badane.

21 Lani selitshengise ukuthi kalilancedo; libona into eyesabekayo beselisesaba.

22 Sengake ngatsho yini ukuthi, ‘Ake lingihlawulele lokhu, ngihlengani ngempahla yenu,

23 ngikhululani esandleni sesitha, ngihlengani ekufithizelweni ngabalesihluku’?

24 “Ngifundisani, ngakho ngizathula; ake lingitshengise lapho engiphambanise khona.

25 Abuhlungu kanganani amazwi eqiniso! Kodwa ukuphikisa kwenu kutshengisani?

26 Lizama ukuqondisa engikutshoyo, amazwi omuntu oselahlekelwe lithemba liwathethe njengomoya nje na?

27 Lina lingayenza inkazatho ngezintandane, lithengise lomngane wenu.

28 “Kodwa okwamanje wobani lomusa lingizwele. Ngingaqamba amanga phambi kwenu na?

29 Dedani, lingenzi okungaqondanga; khumbulani kutsha, phela ubuqotho bami busengozini.

30 Kukhona okubi na okusezindebeni zami? Kambe umlomo wami kawukwehlukanisi okubi na?